URA

Projekti ju ofron mbështetje riintegrimi pas kthimit tuaj në Kosovë, për të ju mundësuar riintegrim të qëndrueshëm në vendin tuaj te prejardhjes.

1. Çfarë lloj mbështetjeje ofrohet?

Mbështetja juaj individuale diskutohet në një takim këshillimi në Kosovë dhe mund të përfshijë këto shërbime këshillimi dhe mbështetje materiale:

Shërbime këshillimi dhe përkujdesjeje

• Nëse është e nevojshme, pritje dhe orientim fillestar sipas nevojave në aeroport (mund të organizohet para largimit përmes një qendre këshillimi për kthim)
• Përkujdesje psikologjike
• Këshillim social falas
• Ndihmë për gjetjen e punës përmes këshillimit për tregun e punës

Mbështetje financiare në formë të përfitimeve në natyrë

• Pagesa e një ndihme kalimtare (një herë dhe në para në dorë)
• Rimbursim i pjesshëm i shpenzimeve të udhëtimit deri te qendra e kthimit në Prishtinë
• Kontribut për shpenzimet mjekësore
• Kontribut i njëhershëm për sistemim
• Kontribut mujor për shpenzimet e qirasë
• Mbulimi i shpenzimeve për një kurs gjuhe
• Ndihmë financiare për shpenzimet e arsimit / trajnimit
• Ndihmë financiare për shpenzimet e jetesës gjatë arsimimit / trajnimit
• Kontribut në kostot e pagave
• Kapital fillestar për ide biznesi premtuese (vetëm në rast të kthimit vullnetar)

Oferta të veçanta për fëmijë:

• Sigurimi i pajisjeve bazë shkollore për nxënësit e shkollës
• Mbulimi i shpenzimeve për mësime shtesë për fëmijë dhe të rinj
• Mbulimi i shpenzimeve për anëtarësi në shoqata dhe aktivitete të kohës së lirë për fëmijë
• Mbulimi i shpenzimeve për kujdesin ndaj fëmijëve

Ju lutemi kini parasysh: Nuk keni të drejtë ligjore për këtë lloj mbështetjeje.

2. Kush mund të përfitojë mbështetje nga URA?

Shërbimet falas të këshillimit dhe përkujdesjes mund t’i përdorin të gjithë shtetasit e Kosovës që janë kthyer nga Gjermania në Kosovë, vullnetarisht ose me detyrim. Për mbështetjet financiare të përmendura më sipër vlejnë kriteret e mëposhtme:

• Kthimi nga një prej landeve federale pjesëmarrëse në projekt: Baden-Württemberg, Berlin, Bremen, Saksonia e Poshtme, Renania Veriore-Vestfalia (vetëm personat që kthehen vullnetarisht), Saksonia, Saksonia-Anhalti, Shlesvigu-Holsti­ni, Turingia (vetëm personat që kthehen vullnetarisht).
• gjendje varfëri materiale
• kohëzgjatja minimale e qëndrimit prej gjashtë muajsh në Gjermani menjëherë para kthimit
• Afati i regjistrimit: brenda tetë javësh pas kthimit në Kosovë, personalisht në qendrën e kthimit URA në Prishtinë.

3. Si mund të merrni mbështetje nga URA?

Për përfitimin e shërbimeve të mbështetjes mund të regjistroheni vetëm në Qendrën e Kthimit në Prishtinë:

• Ju lutemi, regjistrohuni personalisht në zyrën e projektit në Prishtinë brenda 8 javësh pas kthimit tuaj.
• Pas regjistrimit të të dhënave tuaja do të kontrollohet nëse plotësohen kushtet për mbështetje financiare (shih pikën 2).
• Ju lutemi, të sillni patjetër dokumentet e pasaportës dhe dëshmi të largimit, nëse ka.

4. Cilat dokumente duhet t’i keni me vete?

Për t'u përgatitur për kthimin tuaj në mënyrën më të mirë të mundshme dhe për të nisur shpejt hapat e parë të procesit të riintegrimit, para se të largoheni, ju rekomandojmë të aplikoni për ose të paketoni dokumentet e mëposhtme:

• certifikatë ndërkombëtare e lindjes për fëmijët e lindur në Gjermani (për regjistrim në sistemin arsimor dhe social të Kosovës)
• nëse ekziston, vërtetimi juaj për kalim kufiri (GÜB)
• biletat e aeroplanit ose të autobusit
• nëse ka, dëshmi pune, dëftesa shkollore dhe dokumente të tjera kualifikimi
• nëse ka, dokumente të tjera, p.sh. për marrjen e përfitimeve sociale, vërtetime page, dëshmi page etj.

5. Si mund të vini në kontakt me URA?

Projektin mund ta gjeni në adresën vijuese ose ta kontaktoni me telefon në numrin e dhënë më poshtë:
Rruga Arkitekt Karl Gega nr. 38
10000 Prishtinë
Republika e Kosovës
Tel.: +383 45 625 886

Orari i pritjes është nga e hëna deri të premten, prej 09:00 deri 11:30 dhe nga 12:30 deri 16:00

Projekti financohet nga Zyra Federale për Migracion dhe Refugjatë (BAMF) si edhe aktualisht nga nëntë lande federale dhe zbatohet nga Deutsche Gesellschaft für Internationale Zusammenarbeit (GIZ) GmbH, me qëllim që të mbështetet riintegrimi i qëndrueshëm i të kthyerve në vend.